هاتى ورقه وقلم ودونى القواعد وكل يوم تقريها حتى تثبت فى عقلك وتكون من عاداتك اليوميه........
الموضوع منقول كله من استاذه تقول على لسانها
البروفايل ده عملته خالصاً لوجه الله عشان اتشارك معاكم من العلم الذي علمني ربي.
أنا ربنا إداني موهبة الكتابة وحببني في القراءة و أجيد اللغات الانجليزية و الفرنسية لذلك حطيت إيدي على مجموعة كتب رائعة عن التطوير الذاتي و العلاقات الانسانية و الزوجية و لقيت إنه للأسف الكتب دي مش كلها مترجمة للعربي يعني احنا مفوتين على نفسنا كنز من المعرفة ممكن يخلي حياتنا أفضل بكتييير ... المعرفة دي عشان نوصل لها المطلوب منا ندفع فلوس كتير في محاضرات رغم إن كل ده موجود قدام عنينا بس فين مهارات اجادة اللغة مش كل الناس ربنا يسر لهم يتعلمو لغات أجنبية و لو وجدت مهارات اللغة ممكن متكنش معاهم مهارة الكتابة ... أنا حسيت إن ربنا إداني الموهبتين دول عشان أنفع بهم نفسي و الناس اللي حوالايا و حلمي أبقى محاضرة عالمية زي الدكتور الفقي الله يرحمو بس لغاية ما أوصل للهدف ده أنا هبتدي من هنا ، من المنتدى ده و هدفي إن في يوم من الأيام ألف على كل الدول العربية و ألقي محاضرات و اشارك الناس الحاجات اللي أعرفها وربنا يجعل لي صدقة جارية يااا رب تقبل مني .
أول كتاب هبدأ به هو كتاب "لماذا يحب الرجل المرأة القوية "
Why Men Love Bitches
والكلمة بالانجليزي لا تعني المرأة الساقطة و انما القصد هو المرأة القوية الواثقة من نفسها التي تجعل الرجل يحترمها قبل أن يحبها و يعمل لها ألف حساب ... ( إن شاء الله حساب واحد بس احنا حنطمع ههههه )
أنا لقيت تلخيص للكتاب على النت بس أنا شايفة إنه مداش الكتاب حقه ... لدا حاعمل سلسلة من حلقات كل مرة كنتكلم فيها عن نقطة معينة و ازاي الزوجة تتحول من "ممسحة الرجلين اللي بتتحط قدام الباب دي
لفتاة الأحلام دي
From Doormat to dream girl
مش أنا اللي بقول والله ده الكتاب
تابعوني بكرة إن شاء الله في أول حلقة من سلسلتنا الجميلة
أستودعكم الله
الحلقة الاولى:-
مقدرتش اصبر لبكرة عشان تعرفو أدي إيه متحمسة للموضوع
اعرفي نفسك الأول هل إنتي "حبوبة" و لا "قوية" ؟
الفتاة الحبوبة :
الكتاب بيفرق بين نوعين من الستات "الفتاة الحبوبة" و "الفتاة القوية"
تعالوا نتعرف على الفتاة الحبوبة و نشوف ازاي لطافتها الزايدة بتخليه ممسحة رجلين للي يسوى و اللي ما يسواش
الكتاب بيقولك إن الفتاة الحبوبة هي اللي بتعطي "فوق طاقتها" وحطي 100 خط على "فوق طاقتها" دي و بتدي كتير كتير على أمل إن الطرف الاخر يفهم نفسه و يردلها اللي هي بتعملو عشانه.
الفتاة الحبوبة هي اللي بتعمل أييييي حاجة تعتقد أن زوجها هيحبها عشان عايزة بأي ثمن تحافظ على العلاقة ... ده مش غلط على فكرة بس أي شيء لو زاد عن حده إنقلب إلى ضده أنا هرجع وهفصل في النقطة دي عشان ستات كتيير بتعتقد انها لما تمسح شخصيتها وتعمل كل حاجة بيحبها الرجل بكدة هتكسب رضاه، لأ يا حبيبتي الحكاية غير كدة خالص ...
الفتاة الحبوبة بتخلي الرجل هو مركز الكون بالنسبة ليها ... فوقي يا حبيبتي الشمس هي مركز الكون مش سي سيد بتاعك ههههه
أنا والله ما عاملة الموضوع عشان أسخن الستات على رجالتهم بس هم عايزين كده، "القط يحب خناقه" والرجالة بيحب التحديات و يحب يطلعو أسوار ويقطعو فيافي عشان يوصلولك و لو إنتي حطيتي نفسك على طبق من فضة و رشتي على نفسك شوية ملح و فلفل وقلتيلو كلني بالهنا و الشفا هيزهد فيكي ...
عشان اديكو صورة بصرية أنا بتخيل الفتاة الحبوبة كده
مسكينة عاملة زي بطارية Duracell تدوم 6 مرات أكثر ههههههه
و القوية كده :
......
تحسيها برنسيسة كده حتى لو بتعمل شغل البيت
الحلقة الثانية :-
الموضوع هيبقى على شكل قواعد (100 قاعدة ) كل قاعدة بتتكلم عن مفهوم معين لازم يتصلح في نظرتنا للعلاقة الزوجية ونبدأ على بركة الله
القاعدة الاولى : قولي ورايا "أي حاجة بنجري وراها بتهرب مننا"
وأولهم الراجل و لو مصدقتونيش شوفو الست دي ههههه
النقطة الاولى >>> التجاوزات و ما أدراك ما التجاوزات ...
الكتاب هنا بيتكلم عن الستات اللي بيسلموا نفسهم للراجل بسهولة قبل ما يتأكدو من أخلاقه و يعرفو إن كان بيبحث عن علاقة جدية و لا عايزة يتسلى و ده لأن المواعدة (dating) عندهم شيء عادي بس للأسف أنا بدخل على المحتارة كل يوم و كل يوم اقرأ كلمة "تجاوزات" دي في أكتر من موضوع يومياً !! وعايزة أقولك لو الكتاب بيقول إن الرجل "الغربي" اللي الجنس عندهم مباح و شيء عادي هيهرب من البنت اللي ادتو نفسها بسهولة فمابالك بالمسلمة اللي ضربت عرض الحائط دينها و أخلاقها و أعراف مجتمعها ؟؟؟؟؟؟؟ و لو إن ده مش موضوعنا لكن بيفسر كتير من حالات نمردة الزوج على زوجته لو هي محظوظة أوي و كمل معاها و اتجوزها بعد التجاوزات اللي كانت بينهم .
طب ليه الرجل بيهرب من الست اللي اداتو نفسها بسهولة ... عشان محترمتش نفسها ازاي حتنتظر منه إنو يحترمها ؟؟؟ لو مديتش قيمة لنفسك الرجل عمرو ما هيدهالك !!! تخيلي لو بضاعة محطوطة في سوبر ماركت ومش عليها أي سعر وكاتبين عليها "إدفع اللي إنت عايزو" تفتكرو في حد هيدفع فيها قرش صاغ ... ده يبقى مغفل و لا مؤاخذة !!
البنات اللي بتسمح لنفسها بالتجاوزات قبل الجواز ... خطيبك هيظن فيكي حاجة من الاثنين و الاثنين أنيل من بعض
الاولى : انك يائسة من إن حد تاني هيخبط بابك و بتدولي نفسك عشان تربطيه ليكي ... و الرجل لما يحس إن الست مدلوقة و يائسة بيزهد فيها على طول..
الثانية : انها انسانة مش مظبوطة والعياذ بالله و بتعمل كدة مع أي حد يطلب منها.. و دي حاجة حتى الغربيين مش بيتقبلوها فما بالك بالرجل المسلم و لا خلينا نقول الشرقي اللي عنده كلاكيع مكلكعة جواه !
النقطة الثانية >>> لو إنت بتموتي نفسك عشان تبهريه ...
في أول جوازكم بتقضي اليوم في المطبخ تحضري المحمر و المشمر و 6 اصناف أكل عشان تبينيلوه انك طباخة بريمو وده على حساب نفسك و وقتك و انشغالاتك ... لا يا حبيبتي هو طبق واحد و سلطة و يوم ما تعملي بوفيه محترم هيحس إن اليوم ده عيد العمال على رأي "أحمد عيد " في فيلم ثقافي هههههه وهيحس إنه ملك و انك إتكرمتي بوقتك الثمين و قضيتيه في المطبخ عشانه ...
تابعوا معانا القاعدة الثانية في الحلقة المقبلة إن شاء الله
الحلقة الثالثة:-
القاعدة الثانية : الستات اللي بيخلو الرجالة يتسلقو جبال ويقطعو بحور عشان يوصلولهم غالباً ما بيكنوش ستات استثنائين يعني مش شرط تكون super woman، بس الستات دول بتكون فيهم ميزة مش عند الفتاة الحبوبة وهي انهم مش بيبانو مدلوقين ...
والحتة دي عايزة أشرحها كويس عشان مهمة قوي
المسألة هنا ماينفعش فيها تمثيل ... يعني إيه يا بطة (بطة دي أنا يعني ههه ) يعني احنا لازم فعلاً نحس من جوانا إننا مش مدلوقين ... ازاي ؟؟؟ بصي المسألة بسيطة قوي وخلاصتها انك بدل متركزي مع جوزك ركزي مع نفسك ...
يعني متخليش جوزك السبب الوحيد لسعادتك أو شقائك
خلي نفسك أهم حد في حياتك
لو عملتي لووك جديد يبقى عشان تدلعي نفسك، لو لبست حاجة جديدة يبقى عشان تشوفي نفسك جميلة وصدقيني كل ما حبيتي نفسك و دلعتيها كتلاقيه هو اللي بقى يدور في فلكك مش العكس
لما يحس انك مش بتحمليه هو مسؤولية إنو يصنع سعادتك وانك سعيدة مع نفسك و مزقططة كدا على طول و فرفوشة هيحب قربك و هيضيف لسعادتك ...
قولي وريا "أنا بحب نفسي" "أنا أهم حد في حياتي"
لو حسستيه من أول يوم انك بتتنفسي بس عشان هو معاكي و انك مستعدة تسوي الهوايل عشان يبقى جنبك يبقى قولي على نفسك يا رحمان يا رحيم عشان الراجل ما بيصدق يلاقي ست زي دي و بياخذها لعبة مسلية ويقول مع نفسه أما شوف قدرة تحملها قد إيه (فاكرين بطارية Duracell هههه حيفضل وراكي لحد ما يشوف إنتي بتستحمل كم مرة أكثر)
لو انتو مخطوبين و ما أتصلش عنو ما يتصل
متحسسهوش إن ما وركشي حاجة في الدنيا دي غيرو ... اوعي اوعي ... لو رنيتي عليه مرة و مجاوبش كفاية قوي مش لما يفتح الموبايل يلاقي عشرين missed call ... بطلة العالم في المسدات على رأي رامز جلال في "أحلام الفتى الطائش" ههههههه لو كنتو شفتو الفيلم إفتكرو نشوى مصطفى كانت مدلوقة عليه ازاي و ازاي كان مخنوق منها هههه
أنا كدة كملت في النقطة دي وإلى الحلقة القادمة
الحلقة الرابعة :
و ارجعنالكوم و حلقة جديدة من سلسلتنا و هدفنا هو ان كل ست تبقى معززة مكرمة مع جوزها
القاعدة الثالثة : المرأة اللي بتدي للرجل التحدي العقلي mental challenge اللي بيدور عليه واللي بيخليه بيدور على رضاها هي الست اللي مش بتحسسو إنه ضامنها بدرجة 100% و بتبقى غامضة ومتقدرش تتوقع ردود أفعالها
تخيلي المنظر ده :
سي السيد قاعد مشغول في حاجة بيحبها، بيتفرج على ماتش كورة و لا بينظف عدة الصيد و لا بيقرا الجرنان و أمينة قاعدة بتبحلق في جماله و تقول في نفسها سبحان الذي خلقه ههههه لا يا حبيبتي لو هو بيعمل حاجة ومشغول فيها اشغلي نفسك إنتي كمان إن شاء الله تجيبي عدة المانيكير بتاعك و اقعدي اعملي ظوافرك جنبه، و لا هاتي كتاب اقريه ولو كان في مجال هو مش متوقع انك تهتمي به يبقى أحسن المهم حاجة كده روشة مش الغسيل و التنظيف و لو اختفيتي في اودة تانية يبقى احسن و احسن هيقول في نفسو "هي امينة رفعت الحظر الجوي و راحت فين تكونش رمت نفسها من البلكونة هههههههههه ..
طب لو هو بيعمل كدة على طوووول يعني مش بيديكي وقت و بقى ده العادي بتاعو، حاولي تشاغليه وبطريقة محببة و شقية قولي لو "حبيبي وحشتني القاعدة معاك و وحشني نرغي مع بعض" بس ما تدخليش عليه بأسلوب الهجوم مش بيجيب أي نتيجة
التحدي العقلي اللي بنتكلم عنه ملوش أي علاقة بالنكد و النقار على الفاضي و المليان، التحدي العقلي هو أنك تعرفيه بالأفعال مش الأقوال انك مش مستعدة تغيري من نفسك 180 درجة عشان خاطر عيونه، يعني لو وحده شعرها اسود و عرفت أن جوزها بيحب الشعر الأشقر تلاقيها فريييرة على الكوافير تعمل شعرها أشقر ... ازاي هيترجم عقلو حاجة زي دي " الست دي أنا متحكم فيها 100% و اللي أشرت عليه هتعملو حتى من غير ما أقول "
البنت الحبوبة بتدي 120% من نفسها و مش بتتوقف للحظات عشان تقيم العلاقة و تشوف هل هي بتلاقي المقابل على اللي هي بتعمله و هي لما بتعمل كده كأنها بتقولو " بص أنا مهما اديتاك مش هيكفيك ويوفيك حقك و أنا عشان مستهلكش هموت نفسي و أسوي الهوايل عشان ترضى بيا و تتكرم و تفضل جنبي" صدقني هو ده اللي هيفكر فيه و هو شايفك ماشية على قشر البيض علشانه ...
البنت القوية ثقتها بنفسها و شكلها و شخصيتها بتخلي الرجل يسمع منها (من غير ما تقول ) : "أنا كده وانا حابة نفسي كده و أنا كويسة كدة و لو إنت عندك رأي تاني يبقى دي مشكلتك مش مشكلتي ... " إنتي طبعاً مش هتقوليلو كده في وشه بص ذي ما قلت تصرفات اللي هتخليه يحس بكده و- لو إستدعى الأمر و علق على حاجة فيكي سعتها قليلو "أنا حابة نفسي كده و خليكي واثقة من نفسك وصدقيني لو إنتي حابة نفسك هتطلع طبيعية ...
في امان الله و موعدنا الحلقة القادمة ان شاء الله
الحلقة الخامسة
و رجعنا مع القاعدة الرابعة
القاعدة الرابعة : الراجل ساعات بيتعمد إنه ميتصلش بيكي بس عشان يشوفك هتتصرفي ازاي (المخطوبات خصوصاً بيعشو الحالة دي)
الراجل في طبعه إنه يحط الست تحت الإختبار (يجس ميتها زي ما بنقول) عشان يعرف إلى أي حد ممكن يسوق عليها هبلو مش كل الرجالة كده بس فئة عريضة منهم كده للأسف، تخيلي زي كده مع الأطفال الصغيرين لما يحس إن حاجة ضايقتك و يفضل يعيد ويزيد فيها عشان تفقدي أعصابك و هو بيعمل كده بس عشان يحس إنه مهم ويجذب الانتباه ليه .
الراجل كمان بيعمل كده عشان يعرف راسه من رجليه في العلاقة دي يعني إيه ؟ يعني لو متصلش يوم و إنتي أعلنت حالة الطوارئ و إشتغلتي بالميسدات و المسجات "فينك يا حبيبي" "إنت زعلان مني" "طب أنا عملتلك حاجة" "طب ردي علي بس" يااه تلاقيه هو على الناحية التانية منكشح قوي و هو شايفك بتديه كل الكروت اللي هيحاربك بها بعد كده، هيعرف و يتأكد انك مدلوقة عليه و إنه متحكم فيكي إلى أقصى الحدود و لو عيطتي تبقي دقتي مسمار في نعش الشخصية القوية اللي عايزة توصليلها.
خليه لما يتوقع انك هتتصرفي بطريقة معينة تعملي عكسها ... ده هيديلو الاحساس انك ست غامضة و الرجال بيموتو في الروايات البوليسية ههههه نقوليش يا ختي فاكرين نفسهم المفتش كرومبو
لو متصلش تعملي إيه ؟؟ و لا حاجة ... لو إتصل اخيراً خليكي عادي ازيك يا فلان أخبارك إيه عاادي جداً
سعتها هيحصل : المفتش كرومبو هيكتشف بسلامته إنه كان غلطان في روحه و إن لو متصلش بيكي الشمس برضه هتطلع في معادها و الناس هتروح شغلها عادي يعني مش هيعملوه حداد عام و لا حاجة هههههه
أبوس اديك و دماغك لو كلمك بلاش تقليلو "إنت ليه متصلتش؟؟؟؟" أو تزعقي ويبقى صوتك عالي و خشن كأنك بالعة ذكر بط هههه خليكي كوول ما هو إنتي من كتر ما عندك حاجات مهمة قوي و مسلية ما خدتيش بالك إنه ماتصلش، ولو حاول يلمح للموضوع و قالك مثلاً "ياه احنا بقالنا كذا يوم مكلمنش بعض" "قوليلو والله ؟ ياه الوقت بيمر بسرعة أصلي كنت ملخومة مع الخياطة و بنزل نشتري الحاجات و الكلية ما إنت عارف ... ما بحسش باليوم بيخلص امتى " ... وقيسي على كده هيبقى هو عايزة مكان يحشر نفسه فيه وسط مسؤلياتك الجسيمة
يعني اعملي نفسك و لا أجدعها سيدة أعمال و مش ناقص غير تشغلي سكرتيرة تزبط ليكي مواعيدك
وحاجة تانية لو انتو بتكلمو وقلك فجأة بقولك إيه يا الله سلام عشان وريا حاجة و لا عايز أنام ولا أي حجة عشان ينهي المكالمة اوعي تقليلو "خليك معايا شوية" " هو أنا لسة اتكلمت معك" ... بمجرد ما يقلك سلام قليلو أنا كمان عندي كذا و كذا أما ألحق أعمل حاجة يا الله سلااام
و أخيراً و ليس أخراً ... بيقلك كتر السلام بيقل المعرفة ، خلي مكالمتكم في الفترة دي على خفيف والمتجوزين لو جوزك مسافر و اتكلمتو فعشان تقوليلو بحبك، وحشتني وخليها مكالمة عسل كده وخفيفة عشان يبقى حابب يكلمك مش تقوليلو العيال جننوني و أمك عملت و سوت (اللي جوزها بيسافر لفترات قصيرة أما لو جوزك في الغربة فمفيش مفر بس إنتي خليكي إيجابية على قد ما تقدري)
و إرجعنالكو وحقائق عن الرجال والجواز تكشف لأول مرة
الحلقة السادسة :
القاعدة : الرجل هيشوفك بنفس الطريقة اللي بتشوفي بيها نفسك و هيعاملك بالطريقة اللي إنتي بتعاملي بيها نفسك
ساعات حتى لو الست ملكة جمال بس مش واثقة من نفسها و عمالة تبعث في رسايل سلبية لعقل جوزها الباطن وهو عمال يخزن ...
أنا حاسة نفسي تخنت دانا بقيت أطلع السلم بالعافية
مش عارفة أنزل ال10 كيلو اللي زدتهم بعد الولادة
يااا وشي أصفر
البطن دي بقت عملالي عقدة
وهو عمال يقول في نفسه : غني، إشجيني، قسمي وسمعيني، أنا إيه اللي كان رماني الرمية دي واتجوزت الست اللي فيها كل عبر الدنيا هههه
وساعات تلاقي وحدة كلبوزة كده وعسل ومتصالحة مع نفسها، لو تعرفو الممثلة الأمريكية التخينة السمرة اللي إسمها كوين لطيفة Queen Latifa دي مثال حي على الست التخينة المغرية الجذابة للرجال، بتمشي تتقصع ولا على بالها كأنها بتقول يا أرض اتهدي ما عليك قدي ههههه وعندها ثقة متناهية في نفسها لدرجة اني اللي بيتفرج بيصدق انها حلوة.
بصي كده تعابير وشها كلها ثقة ازاي
أنا مش بقول إن الست التخينة لازم تفضل تخينة ومتعملش رجيم بس يبقى الدافع انك إنتي عايزة تحافظي على صحتك مش عشان ده عيب جمالي فيكي
عايزكي تفهمي حاجة مهمة قوي قوي قوي واسمعيني منك ليها و طرطقي وداااانك عشان النقطة دي مهما قوي و أغلبية البنات الحبوبات بتغيب عن بالهم :
الراجل مش بيتجوز وحدة إلا لو هي فعلاً فعلاً عاجباه و مالية عينو ... حلو الكلام ؟؟؟
الكلام ده معناه إيه ؟ معناه إنك فعلاً حلوة في عينو
طيب ليه بتتعاملي معاه على أساس انك أقل منو و إنو عمل فيكي خير و اتجوزك ؟؟
لاااااا يا حبيبتي هو اختارك عشان فعلا عجبتيه ، لاااازم تتعاملي معاه على الأساس ده أنك لقطة ومفيش زيك وإبعتيلو رسائل إيجابية عن نفسك
الأخوات طالبوني بأمثلة و أنا هحاول اديكو عينات :
مثلاً اشتريتي حاجة جديدة لانجري مثلاً قبل متلبسيها لو ويشوفها قوليلو : أما أنا اشتريت حتة bra كان هياكل من جسمي حتة هههه ده أنا حتى حسدت نفسي ههه و قيس على ذلك
و لو اعجابه قل بعد كده يبقى إنتي السبب عشان إنتي اللي بتوصليلو إحساس انك "مش قد المقام"
عمرك ما تتعاملي مع نفسك على انك قليلة الجاذبية و الدليل على غلط تفكيرك إن جوزك إنجذب ليكي .... الناس أذوااق
قولي ورايا :
أنا حلوة و جذابة في عين جوزي وإلا مكنش اختارني و اتجوزني من وسط ميات
الحلقة السابعة :
القاعدة : تصرفي زي ما تكوني جائزة Prize (يعني حاجة صعبة المنال و الناس بتتعب عشان توصل لها) و هو مع الوقت هيصدق انك كده فعلاً
متحطيش نفسك في مقارنة مع أي ست تانية، يعني لو إنت مع جوزك في مكان و ست حلوة معدية وجوزك بص عليها أو وحدة في العيلة مثلاً قربتو و لا حاجة و إنتي بينتي انك متغاظة و لمتيه ازاي يبصلها إنتي عارفة سعتها بتعملي إيه ؟؟ بتخلي واحدة تقيمها 6 من عشرة تبان في عينيه انها عشرة على عشرة و جوزك هيفتكر ما دام إنتي غرتي منها يبقى هي فعلاً جامدة ... ودماغو تبتدي تودي وتجيب بس لو عملت نفسك و لا كأنك حاسة بحاجة و ولا كأنك شايفاها أصلاً هو هيستغرب من رد فعلك و هيعجب من ثقتك بنفسك و هتبتدي الست دي تبان ليه عادية .
اعرفي إن أي وحدة تبيني انك غيرنة منها بتخليها تستمد قوتها من ضعفك و عدم ثقتك بنفسك.
أبسط مثال : النجمات و المغنيات ... لو جوزك قالك بصي المغنية الفلانية جامدة دي ملهاش حل مزة مزة (يعني قاومي رغبتك انك تغرقيه في بانيو الحمام وتديه للقطط تاكله بعد كده )
اضحكي بدلع كده و قولي لو "أيوة معك حق بس لازم تشوفها يا حبيبي قبل عمليات التجميل و المكياج أنا بدخل على سايت فيه صورهم قبل وبعد ياااي دول كانو فيين و بقو فين" وفي سايت فعلاً بيورهم من غير مكياج وقبل الشد والنفخ حاجة مسخرة يعني ههههههه لو ورتهولو ابقي قابليني لو فكر مرة تانية يغيظك بوحدة منهم هههههه
و حطي فبالك إن الاعجاب ده اللي مكن يحس بيه جوزك ناحية وحدة تانية ماشية في الشارع و لا في التلفزيون إعجاب عمره قصير جدا ممكن ميتعداش ثواني و لا دقائق بس إنتي اللي ممكن بسوء تصرفك تحويليه لإعجاب حقيقي !!
هنرجع للبنت الحبوبة و المقارنة بينها و بين البنت القوية عشان المفاهيم دي تتثبت :
احنا قلنا إن البنت الحبوبة عندها ميل انها تتفانى في خدمة جوزها من غير ما يكون مقابل منه على اللي هي بتعمله، مثلاً : في حالة المخطوبات هي اللي تتصل ديماً، في حالة المتزوجات بتحبس نفسها في المطبخ عشان تطبخلو كل ما لذ وطاب و هو و لا سائل فيها ، في متل أمريكي بيقول "الشمعة اللي بتحترق مرتين أكتر عشان تنور كويس بتعيش مرتين أقل" يعني حاسبي على نفسك " إن لنفسك عليك حقاً"
في دماغ البنت الحبوبة بتقول : خليني أنا اللي أبدل الجهد الاضافي عشان انجح علاقتنا
في دماغ الرجل بيقول : ياه دي مأفورة (over) عالاخر لازم عشان ماصدقت لقت راجل
في دماغ البنت الحبوبة بتقول : أنا لازم اعتني به و ألبسو و أشيكو و أأكلو و زغطو و مش مشكلة أنا بقى (الحاجات اللي بتعميلهالو دي كويس و ده واجبك كزوجة بس متنسيش نفسك !)
في دماغ الرجل بيقول : أنا عايز ست مش خدامة !
الست القوية بثقتها وغموضها بتخليه بيحبها حتى لو مش عارف ليه . تلاقيه يقولك : أنا بحبها عشان فيها حاجة كده غير كل الستات.
الحلقة الثامنة :-
القاعدة: أكبر إختلاف بين الحبوبة و القوية هو "إحساس الخوف"... الحبوبة بيحركها الخوف ، الخوف من إن جوزها يسيبها، من إنو يبص لبرة ... إلخ
القوية بتعرف تتحكم في الخوف ده و مبتخلهوش يبان لشريك حياتها أو يفسد عليها الاستمتاع بحياتها ...
الأمريكيين بيقولو "الخوف ليه ريحة زيه زي الحب" لو كان واحد واقع على شوشته و عايش قصة حب بيباااان عليه قوي، كذلك الخوف بيبان على صاحبه، و الخوف ضعف والله يحب العبد القوي.
بيقلك إن حب الرجل زي النبتة لو إدتيلو مية كتير في الأول يختنق و يموت، جربتي تغرقي نبتة زغنطوطة بالميه، تفتكري هيحصل لها ايه ؟ هتموت طبعاً !
يعني متديش الرجل حبك كله من الأول، بينك و بين نفسك ممكن بس أدامه لا وألف لا ...
يعني لو عايزة تعبري عن حبك في طرق كتير بس تفادي عبارات زي :
العبارات الممنوعة :
مقدرش أعيش من غيرك
أنا من غيرك و لا حاجة
لو سبتني أموت !!
جربي حاجات إيجابية أكتر :
مثلاً : إنت خليت حياتي أحلى (يعني هي كانت حلوة أصلاً)
إنت أضفت لسعادتي (يعني إنت كنت سعيدة أصلاً)
و قس على ذلك
وحاجة تانية مهمة قوي قوي و عايزاكو تفهموها، أنا لما بقول الست القوية فمش هي الست اللي بتزعق و تشتم و تنكد على جوزها و بتاخد حقها بالبونية و إلا الموضوع ده كله من أساسه ملوش لزمة وكنت قلتلك روحي إتعلمي البوكس و لا الكراتيه هههههه
مش عايزك تبقي زي الست دي ههههه
بالعكس المرأة القوية عسولة و لطيفة (مش ضعيفة) و دبلوماسية و لسانها بينقط سكر و أنثى قوي و بتلبس كويس و تمكيج و تدلع نفسها بس الفرق بينها وبين الطيبة انها بتعمل الحاجات دي بمزاجها و عشان هي متربية كويس و برنسيسة مش لأنها خايفة تفقد الرجل
يعني جربي "متشتميش" جوزك و متعلش صوتك عليه مش لأنك خايفة منه لأ بس عشان دي أخلاقك وتربيتك وهو مع الوقت هيبتدي يخجل من نفسه، و لو حصل و زعقلك إعمليلو The Ice Queen Face يعني وجه ملكة الثلج
الوش ده بيقول أنا زعلانة و مخنوقة منك ومش هرد عليك بس خليه يشوف التعبير ده على وشك يعني لما يزعق برقيلو و بعديها طاطي راسك و إنت راسمة التعبير ده على وشك،
صدقيني بيجيب نتيجة أحسن من انكو تقعدو تشتمو في بعض وإنتي وشك يقلب شراب مقلوب زي كده ههههههه
بذمتكم و أنا راضية ذمتكم ، انهوالأحسن ههههههه
الحلقة التاسعة :
الحلقة دي هنخصصها كلها لدراسة مميزات شخصية البنت "القوية" عشان لو عايزين نغير من نفسنا نعرف نقط الضعف عندنا فين بالظبط.
زي مقلت في الحلقة اللي قبل البنت القوية مش هي البنت اللي بتتكلم بصوت عالي أو تقول كلام جارح و مش مستفزة و لا بغيضة.
البنت القوية "مؤدبة" بس "واضحة" ، بتوصل رأيها و احاسيسها و مشاعرها للرجل بدون خوف ولا خجل و بكل وضوح ... لو عايزة تقولو حاجة مضايقاها مش بتقلبها مناحة و تعيط و الكحل يسيح و مناخيرها تحمر هههههه المنظر ده مبيفكركوش بحد معين
بذمتك عمرك ما قعدتي قدام جوزك بالمنظر ده هههههه
البنت القوية مكن تنزل دمعة وهي بتتكلم عن حاجة جرحتها بس بتعمل كده بدلع و من غير م تفقد اعصابها
زي دي :
البنت القوية بتناقش الرجل بالطريقة اللي بيفهمها و هي طريقة الرجال، عمرك شفتي راجل بيقول لراجل تاني "أصلك طعنتني ف أحاسيسي و جرحت مشاعري" ههههه
الرجالة مبتفهمش في الحوارات دي، كوني واضحة و لبقة معاه من غير ما تفقدي أعصابك و لا تعيطي.
و ننتقل إلى الفقرة اللي كلكم بتستنوها أهم صفات البنت القوية :
1- بتحافظ على استقلاليتها المالية :
مهما كان اللي بتكسبه قليل بتحاول إنها متخليش الرجل ولي نعمتها الوحيد (الكتاب أمريكي و طبعاً هما عندهم الحتة دي مهمة قوي)
2- مبتخليش الرجل مركز الكون بالنسبة لها و الحاجة الوحيدة اللي حياتها بدور حواليها
3- غامضة في تصرفاتها :
يعني مهياش كتاب مفتوح أي واحد يقراه بسهولة ... مش ممكن تتوقع بسهولة هي بتفكر في إيه و لا هتعمل إيه في موضوع معين ... مبتكلمش عن نفسها كتير عشان يفضل ديماً حاجات الراجل ميعرفهاش عنها (يعني الحاجات البسيطة مش بنتكلم عن الأسرار الخطيرة)
4- مبتديش للراجل الفرصة يشوفها في أسوأ حالاتها :
يعني معيطة ومتبهدلة وعمالة تزعق ... بتسيب لحد ما تروق و تعرف هي بتقول إيه ،ساعتها ممكن تفتح نقاش عشان متقولش كلمة تندم عليها بعد كدة.
5- فرفوشة و تحب الضحك والهزار :
من غير ما تقل أدبها على جوزها، هزارها لطيف ومحبب مش بايخ وسمج .
ومننساش إن المرح والضحك بيدي إنطباع عن ثقة عالية بالنفس !
6- بتدي قيمة عالية لنفسها :
لو جوزها مدحها بتبتسم إبتسامة حلوة وتقول متشكرة يا حبيبي مش تعمل منها حدث الاسبوع و تفضل مش مصدقة و تقول "احلف إني عجبتك" هههه البنت القوية بتعتبر دي حاجة عادية يعني إنو يعجب بيها ماهي مفيش منها اتنين ههههه (الثقة الثقة)
7- بتخلي عندها هواية بتحبها عشان مايكونش هو مركز حياتها :
روحي جيم Gym
اعملي إنت وصحباتك نادي كتاب و إجتمعو كل فترة وناقشوا الكتاب ده ولما تروحي للبيت إحكلو قلتو إيه و عملتو إيه
ابتدي اتعلمي لغة جديدة
تطوعي فجمعية خيرية
إدي دروس خصوصية في مجالك للطلبة المعوزين
روحي دار العجزة و تطوعي تساعدي الناس اللي اولادها راميها دي، خليه يحس قد إيه إنت انسانة نبيلة مش بتفكري غير فنفسك وبس
... أنا متأكدة لو فكرتي هتلاقي مليون حاجة تشغلك
8- بتتعامل مع جسمها كأنه قطعة فنية نادرة :
بتحب جسمها و بدلع نفسها
بتمارس رياضة عشان تحافظ على صحتها ورشاقتها
بتلبس كويس
بتاخد بالها من بشرتها و بتحافظ على نظرتها ونعومتها
الحلقة العاشرة :
القاعدة : لو بتضيقي على جوزك الخناق و بتحاصريه فأنتي بتدفعيه إنو يكون ديماً في موقع دفاع عن نفسه و يبتدي يدور عن طرق عشان يهرب من حصارك و يحافظ على حريته
متحسسيش جوزك إنو مضطر ياخد منك الاذن في أي حاجة يعملها، جوزك بيتخنق لما بيحس انك متبعاه و بتحسبي كل خطواته وحطاه تحت ميكروسكوب. الراجل أول ميحس إنو متراقب بيبتدي يحاول يهرب.
حاجات تفادي تعمليها:
- متحوليش تفتشي في صندوق العربية زي ما تكوني بدوري على أثار جريمة
- متحوليش تتصنتي على مكالماتو
- متفتشيش في موبايلو (على الأقل مش قدامه ههههه)
متعامليش جوزك زي ما يكون ولد صغير : متقوليلوش متمشيش حافي، روح إغسل اديك، روح سرح شعرك، لو دخل من برة و مسألش عن الغدا متسئلهوش كل 5 دقايق "إنت جيعان أحطلك الغدا ؟"
لو عايز يخرج مع صحابه بين فترة والتانية متعمليش منها حكاية
متخلهوش يحس أن الوقت اللي بتقدوه مع بعض حاجة مفروضة عليه : "إنت لازم تخرجني"! "إنت إتجوزتني عشان تحبسني؟!" بكده هتكوني بتحولي حاجة المفروض ممتعة ليكو انتو الاثنين لواجب ثقيل على قلبه .
لما الست بتطالب جوزها إنو يهتم بيها و بتلومو لما مش بتلاقي تجاوب ده بيدفعو إنه يتبرم من العطاء ويهملها زيادة
خليه يكون المبادر في العطاء و امدحيه لما يعمل حاجة بتحبيها، المديح هو الطريق الوحيد لتشجيعه على العطاء ... مننحرمش منك، ربنا يخليك لينا ... وبحب قوي الجملة اللي بيقولوها السوريات "الله يديمك فوق راسي" بتدي للرجل إحساس حلو بالقوامة و بتدغدغ رجولته
الحلقة الحادية عشر:-
القاعدة : البنت القوية بتدي لجوزها مساحة من الحرية عشان ميحسش بنفسه محبوس جوة قفصها ... وفي الحالة دي هو اللي يجري وراها عشان يحطها في قفصه !
ملحظتوش إن ساعات لما بيجيليك عريس و بتكون مستثقله دمه و مش بتديه ريق حلو تلاقيه حيتجنن عليكي و كلما إنتي طنشتيه يزيد تمسكه بيكي... الرجالة بتحب الست الصعبة "صدقييييني" الدلقة مفيش أنيل منها !
القط يحب خناقه هههههه
شوفي القط ده، مستمتع ازاي بعملية الخنق، و قاعد ملك كده و لا على باله ... عادي يا حبيبتي مهو اتعود هههههه
خلي شعارنا في المرحلة اللي جاية يبقى
أنا كمان عندي رأي :
أنا أعرف ستات كتير بتخاف تقول رأيها و أي حاجة سألها فيها جوزها تقولوا "اللي تشوفو" "إنت أدرى" ... لاااا لازم يكون ليكي رأيك و كلمتك ابتدي بالحاجات الصغيرة (أنا مبحبش المطعم ده، الفيلم ده شفته و معجبنيش، أنا بفضل المرشح ده عشان كذا و كذا ...) وهو هيتعود إن لكي شخصية مستقلة و أراء مش ديماً بتتوافق مع ارائه عشان كده لااازم تثقفي نفسك و اقطفي من كل بستان زهرة شوية سياسة شوية رياضة ثقافة عامة لغات ... متخليش كل اهتمامك المكياج و الشعر الزايد و خلطات الشعر !! خليه يجي مرة يلاقيكي قاعدة و ماسكة كتاب و مستغرقة فيه ... (و متقلليش مليش خلق على القراية أديكي بتقري في موضوعي اهو و مستنية التكملة من امبارح ... قفشتك ! )
ويا سلام لو قاعدة كده
هههههههه مضمنش انو هيخلكي تكميلي قراية
الرجل يحب الست اللي تقدر تتناقش معاه ده بيحسسه إن عندها ثقة في نفسها مش بتكلم عن العند الفاضي و قول "لا" عمل على بطال، بس لما يكون موقف إنتي شايفة إن عندك فيه رأي لازم يحترم !
متديش الرجل الاحساس انك وردة من غير أشواك، شكيه، السعيه, كهربيه ... خليكي زي الشطة أحلى حاجة فيها هي لسعتها
و اتمنى لكو عطلة نهاية أسبوع مشطشطة ولو انتو خارجين الجمعة دي إنتي اللي تختاري المكان
الحلقة الثانية عشر:-
السلام عليكم وحشتوني قوي
زي ما وعدتكم حنكمل مع بعض و أسرار جديدة عن مفاتيح نجاح العلاقة الزوجية
الدهاء الأنثوي :
الفقرة دي مهمة قوي قوي، و أنا متأكدة انها هتعجبكم أكثر من كل اللي الحاجات اللي قلناها من قبل ... عشان دي مفتاح العلاقة الزوجية الناجحة "ازاي الست تفضل ست و الرجل يفضل راجل في العلاقة و برضه يفضلم سعداء مع بعض ... "كوني له أمة يكن لكي عبداً" ...
أنا سمعاكم بتوشوشو وتقولوا "ازاي بقى يا فاطمة إنتي عمالة من أول الموضوع تقوليلنا لازم نكون أقوياء و عندنا ثقة بالنفس و منسبش حد يعمل خدنا مداس و دلوقتي بتقولي "كوني أمة و عبودية و حاجات من بتاعة عصر الجواري ..."
و عايزة أقولكو معاكم حق بسسسسس النصائح اللي هقلهالكم هتخليكي تحولي "ضعفك الأنثوي الطبيعي " اللي ربنا خلقك بيه لقوة في صالحك. يعني هتشتغليلو في الازرق زي ما عضوة هنا الله يكرمها قالت ههههه
القاعدة الذهبية : المرأة الداهية بتتعامل مع كبرياء الراجل بحرص شديييد.
لو سألتكم إيه نقطة ضعف المرأة في العلاقة الزوجية؟ يعني إيه الحاجة اللي لو الراجل ادهالها هتخليها تحس باشباع و تشجعها تدي أفضل ما عندها في العلاقة ؟
الجواب : الاهتمام و الرومانسية و الدلع ...
طب و الراااجل ......؟؟؟؟
معقول كده متزوجة من كذا سنة و مش عارفة برضه ؟؟؟
لا مش ممكن، كده كتيييييير
هههههه
متزعلوش أنا مش بقطم فيكم، أنا كمان مكنتش عارفة هههه بس عايزة المعلومة دي تعلق في ذاكرتكم
الجواب هو
هو
هو
الثقة بيه و الاعجاب برجولته و كل حاجة بيعملها علشانك و علشان بيته
صدقيني ممكن تكوني لسة امبارح عملالو ليلة من اياهم و مالية الدنيا ورد مجفف و لابسلو لانجري يحل من على حبل المشنقة ههههه و تقومي في الصبح تقوليلو مثلاً حبيبي اديني فلوس عايزة أجيب الحاجة الفلانية، يقوم هو يقلك حاضر يا حبيبتي بس أنا معييش دلوقتي اصبري لاخر الشهر، تقومي إنتي قايلالو : إنت عمرك ما أقلك حاجة و تعملهالي، فلانة جوزها بيجبلها من غير متقول و فلانة جوزها جابلها كذا في عيد ميلادها ... خلاص مش عايزة حاجة ... و تتقمصي و هو يتعكنن عشان :
- أولاً : أغلب الستات عندهم العادات السيئة دي : لما تجي تلوم جوزها على حاجة معملهش تقولو "إنت عمرك" ما عملت (يكفرن العشير و دي و العياذ بالله صفات من صفات نساء جهنم )
( وَرَأَيْتُ أَكْثَرَ أَهْلِهَا النِّسَاءَ قَالُوا بِمَ يَا رَسُولَ اللَّهِ قَالَ بِكُفْرِهِنَّ قِيلَ يَكْفُرْنَ بِاللَّهِ قَالَ يَكْفُرْنَ الْعَشِيرَ وَيَكْفُرْنَ الْإِحْسَانَ لَوْ أَحْسَنْتَ إِلَى إِحْدَاهُنَّ الدَّهْرَ كُلَّهُ ثُمَّ رَأَتْ مِنْكَ شَيْئًا قَالَتْ مَا رَأَيْتُ مِنْكَ خَيْرًا قَطُّ )
يبقى اوعي تعملي كده تاني، إنتي بتقولي كده مجازاً عشان تحسسيه قد إيه إنتي مضايقة بس الرجالة بتفهم المعنى الأول للكلام (كلهم محضروش الحصة اللي خدنا فيها درس "المجاز" باين ههههه )
ثانياً : إنتي بتحطيه في مقارنة مع رجالة ثانية فبتحسسيه بالعجز و ده أصعب إحساس على الراجل.
لو عايزة جوزك يبتدي يديكي وهو مبسوووط بالعطاء استقبلي أي حاجة يجبها أو يعملها بالشكر ... بقولك أيييييي حاجة متقليلش ده واجبه و الكلام الخايب ده جوزك عايزك تدغدغي رجولته، عايزك يشوف نفسه في عينكي هيرو (بطل) مش زيرو ههههه
عندك برطمان اوعي تفتحيه إنتي ، اجري عنده : حبيبي البرطمان ده مش راضي يتفتح ... هيقوم هو بكل قوته مدور الغطا و طبعاً هيتفتح معاه بكل سهولة، قومي إنت قيلاله : تسلم ايدك يا حبيبي الوحدة مش عرفة من غيرك هتعمل إيه يا حبيبي مممممواح (هنا بتديه الاحساس بالقوة)
لمبة بايزة، عفش تقيل ... الحاجات اللي بتتطلب قوة جسمانية دي ادهالو و لما يعملها امدحي فيها و قليلو : ربنا يخليلي العضلات الحلوة دي ... مش عايزة أحلف بس صدقني هيبتدي يلف في البيت و يسألك هو مفيش حاجة بايزة أصلحهلك ههههههه
لما تكونوا راكبين العربية مع بعض وهو اللي سايق، عارفة حزام الامان اللي بنلفو على وسطنا، حطي واحد زيو تمام على بؤك ههههه
زي كده بالظبط
يعني متفضليش تديه إرشادات، خفف السرعة، اوعى اللي قدامك، خد الطريق ده و لو برضه عمله اللي فدماغه و تهتم متبدئيش الموال : مش قلتلك ؟؟؟؟ طب تعالى نسأل حد في الشارع ... لا لا لا لا كل دي تصرفات غلط في غلط ، سيبيه يسوق ، سيبيه يتوه و يدور على الطريق بنفسه ، احنا قلنا إن الرجالة بتحب التحديات و كل اللي عايزه منك الثقة ثم الثقة ثم الثقة.
كاة العلم تبليغه هي صاحبة المشاركة
الحلقة الثالثة عشر :-
القاعدة الذهبية : إدي لجوزك الاحساس إن هو ربان السفينة و هو هيبتدي يعمل الحاجات اللي إنتي عايزاها عشان يحافظ قدامك على صورة "البطل" ...
زي ما قلنا في الحلقة اللي فاتت كلمة الشكر لاازم ولا بد تتقال لما جوزنا حبيبنا يجيب لينا حاجة و لا يسعدنا فحاجة : ربنا ما يحرمنا منك، تعيش و تجيب ...
و مرة كده و لا مرتين في الاسبوع لو عمل حاجة جامدة يعني ألفي شعر، حسسيه إن عمل حاجة جامدة قوي قوي و بوسيه و قوليلو بجد بجد أنا ربنا بيحبني لما رزقني بيك، أنا محظوظة بيك يا حبيبي و كلام من ده ...
يعني الشكر ده يبقى العدي بتاع كل يوم ، و بين فترة و التانية زودي العيار حبة ... و إنتي هتشوفي العجب باذن الله و أمانة لما جوزك يجيب معاه النظام ده نتايج ابقي افتكرني و ادعيلي
نصائح عامة :
- اوعي تقتلي ناموسة و هو جنبك ... أنا هحكلكو بعمل إيه هتموتو من الضحك، في الصيف عندنا بيبقى ناموس كتير و احنا عادة بنشتري الجهاز الطارد للناموس اللي بيتعبى بالأقراص الصغيرة دي فمرة الأقراص دي خلصت و الليلة دي الناموس كان مستقصدني ... فلاقتني بصحيه من أحلى نومة واقله الحق يا حبيبي الناموس مش سابني أنام ، راح قايم زي ما يكون هيحارب عدو و قتلهم كلهم ههههه عشان بطوط يناام ... ومرة كان هو مسافر و أنا بايتة لوحدي فالصبح بيقولي إنتي نمتي كويس : قلتله لأ يا حبيبي الناموس استقوى عليا عشان مكنتش معايا يا حبيبي ههههه
- بلاش دور طرزان خليكي أنثى رقيقة قدامه: متشليش عفش تقيل، متغيريش اللمب، متسرحيش الحوض، اوعي اوعي اوعي تمسكي مضرب الذباب و تصوري قدامه 100 قتيل ههههههه
كلمة السر عشان تكسبي الراجل= خليه يحس إنه الراجل .... بس كده
دلوقتي أغلبكم إتلخبط ومبقاش عارف إيه الصح
نبين قوتنا و إننا مش محتجينه ؟
أو نبان ضعاف و مش عارفين حتى نقتل ناموسة من غيره ؟
أنا حقلكو ... في فرق بين أنك تعملي حاجات تدغدغ كبرياء الراجل و تحسسه برجولته و بين انك تبيني انك مدلوقة و محتاجاه عشان تحسي انك عايشة على وش الدنيا ...... فاهمني ؟
أنا هاؤلك الحاجات اللي مش لازم تحتاجي الرجل فيها عشان متزعزعيش صورة البنت القوية :
- استقرارك العاطفي : يعني متخليش الراجل هو سبب فرحك أو تعاستك
- ثقتك بنفسك : متنتظريش الراجل يقولك إنك حلوة عشان تصدقي انك حلوة
- احساسك بأنك شخص كامل : يعني متحسسهوش انك كنت ولا حاجة قبل ما يتجوزك و إن حياتك كانت تافهة و الكلام ده، إنتي انسان ربنا خلقوا مستقل عشان يأدي رسالة في الدنيا سواء إتجوزتي ولا لأ .
القاعدة الذهبية : لما بتداعبي كبرياء الراجل و تدغدغي رجولته بطريقة لطيفة بتخليه مش بيحاول يفرض سيطرته بالعنف
يعني الراجل كده كده هيحاول يفرض سيطرته عليكي، إنتي بقى بتساعديه يحدد هيعمل كده ازاي ... وده بيفسر الستات اللي بيتعرضو للضرب غالباً بتحط نفسها في موقع ندية مع الراجل ... مش بتاكل عقله بالحنين و تستخدم معاه الدهاء الانثوي ...
وخلينا نلخص الفقرة ونقول :
الست لما تكون أنثى و دلوعة وتحسسه بضعفها (الجسماني مش العقلي والنفسي خالي بالك) = بتنشط عند الراجل غريزة الحماية
الست لما بتبين حتة عنف و خشونة في شخصيتها = بتنشط عند الراجل غريزة المنافسة (يعني بيشوفها ست بشنب هههههه و تستاهل الضرب على نفوخها )
الحلقة الرابعة عشر:-
المهم أنا النهاردة حبيت أفصل في موضوع"دغدغة كبرياء الراجل" عشان هو ده المفتاح لكل مشاكلنا الزوجية تقريباً ...
تلاقي الست بتقلل من جوزها قدام عيلته أو عليتها و لا تحب تبين انها الكل في الكل ... غلط يا أختي غلط قوي، لو عايزة حب جوزك و إحترام عيلتو اعملي لجوزك قيمة كبيرة قدامهم بيني إن كلمته هي اللي ماشية و إنو سي سيد و إنتي أمينة (حتى لو ده مش صحيح) بكده كتكسبي حاجتين :
أولاً حتى لو عيلته كانو قارشين ملحتك و بيشتغلولك في الأزرق و بيحرضو جوزك عليكي لو بينتي قدامهم انك مغلوب على أمرك هيهمدو هيقولوا : أهو كاسر شوكتها و مبتكلمش قدامه ههههه و غالباً هيبطلو اللي بيعملوه
ثانياً إنتي هترضي غرور جوزك قدام ناس تانية يعني لو عملتيها بينك وبينو هيبقى فرحان قوي فمابالك قدام ناس تانية ده ذي ما تكوني بتديلو جايزة أوسكار قدام العالم كله ههههه
خليكي فصفه، اوعي تتحولي لند ليه هايحاول ديماً يكسرك بدل ما يحميكي (غريزة الحماية و المنافسة أنظر الحلقة 13)
إفتكري كويس لو عملتي فيها "الست بشنب (اللي قلنا عليها من قبل) ما في حد هياكل على دماغه غيرك"
الراجل في مجتمعنا متعودش يدي، اتعود ياخد و بس، عشان ده يتغير لازمله شوية تدريب والكي الوصفة السحرية :
المدييييح ... من هنا ورايح استعملي كلمة "مفيش زيك "، "أحلى"، "أحسن" ... كتيير
حبيبي سواقتك مفيش زيها
لو مرة طقت في نفوخو و عمل كوباية شاي : ياااه يا حبيبي أحلى كوباية شاي دقتها فحياتي
لو جابلك هدية : ذوقك يجنن يا حبيبي ...
لو علقلك رف في المطبخ : تسلم ايدك يا حبيبي، على كده عمرنا ما هنحتاج نجيب نجار
أبوس اديكو بلاش أسطوانة الإنتقاد المشروخة ... عارفة ليه الرجالة بتبص برة و مكن يتعلق قلبه بعشيقة ؟؟؟؟؟؟؟؟؟؟
اللي تجاوب اديها جايزة ههههه
عشان
عشان
عشان
إدفعو الأول كل واحدة 10 جنيه بس 11000X مشاهدة (ما شاء الله ) يعملو 110000 جنيه حلوين قوي هههههه
أنا بدحك معاكو
الحكاية وما فيها يا ستي إن في بداية الزواج الست بتكون لسة منبهرة بجوزها و العواطف لسة مشعللة و أي حاجة يعملهالها تلاقيها بتفرح بيها زي العيلة الصغيرة ..... بعد كم سنة جواز الإنبهار بيرووووح في خبر كان و الشعلة بتنطفي و أي حاجة يعملها بتبقى بالنسبة لها عادية ... فايه اللي بيحصل ؟ الراجل بيروح يدور على وحدة تعيشو الاحساس ده من تاني، وحدة يشوف اللهفة والاعجاب في عنيها، وحدات تقولو: برفنك يجنن، ذوقك في اللبس حلو قوي، ياه دمك شربات ...
ولما يروح الشملول عالبيت و الكلام الحلو لسة بيرن في ودانه يلاقي الغفير واقف على الباب مستني ويا ويلو يا سواد ليلو لو كان جاي متأخر هيتمنى لو كانت دهستو عربية وهو جاي في الطريق ههههههه
يبقى إيه ناخد بالنا من الحتة دي، الراجل عايز ست يشوف ديماً في عنيها بريق الاعجاب بيه.... سهلة دي متقلوليش منقدرش ...
نصائح عملية عشان نبين لجوزنا حبيبنا اعجابنا و نخلي شعلة حبنا مشعللة :
- عندك مشكل في شغلك : قليلو حبيبي عند مشكل في شغلي وكنت عايزة أخد رأيك عشان عرفاك ما شاء الله دماغك حلوة وبتفكر صح ( مش ديماً تدخله في مشاكل شغلك يعني مرت كل فين وفين )
- اوعي تنتقد حاجة عملها لكي أو للبيت (عمره ما هيعمل تاني خلي بالك )
- اشكري في سواقته والطريقة اللي بيركن بها العربية
- لو وداك مطعم قليلو : إيه المطعم التحفة ده اكتشفت ازاي
- لو قال نكتة اضحكي جاامد و قليلو إيه النكتة الجامدة دي دمك زي العسل
وأخيراً الجملة اللي اتقالت في أشهر درس إغراء في تاريخ المسرح المصري هههه "إنت جيت (شهقة) يا رمضان ينيلك يابو صيام ههههههه"
أنا وأنا بكتب الموضوع افتكرت مسرحية العيال كبرت وسعيد صالح لما كان بيدردح فمامته ويقولها "الراجل بيحب الست الملعب " ههه والله معه حق
الحلقة الخامسة عشر:-
- أول درس في فن الغموض "متكلميش كتيير" لسانك يا حبيبتي حرام عليكي هيورم هههههه للأسف الرغي الكتير و إعطاء تفاصيل كتير عن نفسك بتحبي إيه بتكرهي إيه، ازاي قضيتي يومك بالتفصييييل، كلتي إيه، الجارة قالت إيه، و عايزة تعملي إيه بكرة و هتطبخي إيه على العشا ... إلخ ، كلها حاجات هتخليكي كتاب مفتوح قدام جوزك ...
الصمت بيديكي جاذبية و بيخلي الراجل يخمن ويتسائل "يا ترى بتفكر فإيه؟" و هيحس إن عندك حاجات مهمة شاغلاك
- خلي ليكي هوايات و إهتمامات أنا مثلاً بعشق القراءة و بكتب كمان و عندي مدونة يعني كل ما ألاقي جوزي مشغول عني فحاجة مش بضايق خالص بديه الحق إنه يكون ليه وقت خاص بيه يعمل فيه اللي هو عايزه و أنا كمان بجري على مكتبتي أجيب منها كتاب حلو وبقراه بتمعن و إستمتاع (مش كده وكده بس عشان أبين ليه اني مشغولة) وانتو كمان ممكن تضربو عصفورين بحجر واحد : "تبانو مشغولين و عندكو إهتمامات" و في نفس الوقت "تطورو من نفسكم" ، في سلسة كتب لكاتب شاب إسمه كريم الشاذلي عن العلاقة الزوجية لذيذة قوي و ممتعة حتى لو مكنش لكي في القراية هتلاقي نفسك مستمتعة بيها و هتفيدك قوي كمان ... أنا هديكو لائحة بالكتب اللي مكن تفدكو في حياتكو و اللي أنا شخصياً استفدت منها قوي
عمرو خالد : الجنة في بيوتنا
كريم الشاذلي : إمرأة من طراز خاص، ما لم يخبرني به ابي عن الحياة، سحابة صيف، لغات الحب، جرعات من الحب، إلى حبيبين، أسطورة الحب (السلسة كلها روعة و هتثري ثقافتك الزوجية كتيييييير)
مجموعة كتب جاسم المطوع
وحبذا لو جبتي كتب فيها ثقافة عامة : أنا بحب قوي كتابات أنيس منصور الله يرحمه خصوصاً كتاب "حول العالم في 200 يوم" رااائع بجد هتعيشي معاه أنا ببقى ماسكة الكتاب و بضحك لوحدي ذي المجنونة هههههههه ولو عايزين هجبلكم لائحة كتب كويسة قوي فكل المجلات ...
إقرأوا يا أمة "إقرأ"
- لما تزعلي منه بدل ما تنفجري فيه و تتكلمي كتير كلام ممكن يستعملو ضدك بعدين عبري عن غضبك "بصمت + نظرات ثاقبة تعبر عن اللي جواكي" ده هيخليه مش عارف إنتي بتفكري فإيه و ناوية على إيه.
- متتكلميش في الناس : سبحان الله الاسلام حرم الغيبة وهي فعلاً خصلة قبيحة جداً ده غير انها هتدي جوزك الإنطباع انك موركيش حاجة غير الجري ورا أسرار الناس و إن دماغك فاضية من المواضيع المهمة لدرجة إنك مش لقيت حاجة تكلمي فيها غير اللث والعجن في أمور الناس
- النقطة دي مهمة و أنا كمان كنت برتكب الغلط ده : الكومدينه بتاعتك أخبارها إيه ؟ زمانك فاردة كل مستحضرات التجميل اللي عندك و العطور و المكياج فوقيها .... غلط
طب ليه يا بطوط فيها إيه ؟؟؟
فيها إن الحاجات دي اسلحتك السرية مينفعش العدو يشوفها ههههه قصدي الحبيب اللبيب متزعليش أنا بدحك معاكي
إنتي لو كنت مخبية الحاجات دي و كلمة ما جيتي تعمل ميكاب إستخبتي و حطيتي حاجة خفيفة Nude Make Up جوزك هيفتكر إن دي اطلالتك الطبيعية
بس لو إنت حطيتي قدامه ترسانة المكياج بتاعك هيفتكر انك متقدرش تستغني عنه عشان تباني حلوة
صدقوني الرجالة مبتخدش بالها من الحاجات دي و ممكن تخدعيه بسهولة هههههه
- متخليش كل تصرفاتك متوقعة : يعني لو متعودة تعملي حاجة ديماً غيريها من وقت للتاني : ستايل لبسك، برفنك، الاكسسوارات بتاعتك، ميعاد صحيانك ... البسيلو هدومه من وقت لتاني ههههه والله بتكلم جد يعني لو متلاً جاكت رياضي ولا تي شيرت ...
وبكده أكون كملت موضوع الغمووض
الحلقة السادسة عشر :-
السلام عليكم يا أحلى فتوكات،
أولاً أحب أقولكو انكم وحشتوني قوي و زي ما كتبت امبارح أنا السبت و الأحد لظروف معينة ببقى مسافرة أنا وجوزي (البلد اللي أنا فيها اجازتها سبت و أحد) و مش بقدر أدخل على النت عشان كده منزلتش حاجة من يوم الجمعة ، سماااح يا قمرات
حلقتنا النهاردة عن صفة بتتميز بيها الست العربية عموماً إلا من رحم ربي و هي صفة وحشة بس خطورتها إن اللي بتعملها مبتكونش واخدة بالها منها ... و الصفة اللي بتكلم عليها هي ...
النقار و النكد
كم وحدة فيكم حصلها و بيحصلها السيناريو ده ؟
يدخل سبع البرومبة يلاقيكي حطالو اشي أخضر و شي أحمر و لابسلو شفتشي ههههه يقوم بكل استهبال يقلك في غدا ؟ أنا جعان !!! وتحطيلو الغدا و تستني إن أبو الهول ينطق و لا كان ينطق و يسيبك ويروح لمحبوبة الملايين، اللي مجبتهاش ولادة .... أكيد كلكو عارفينها
الريموووووت ههههههه
يا ترى بتعملي إيه سعتها ؟ بتعيطي و تقوليلو إنت مبتشوفش مبتحسش وإنت إنت إنت ... هو على فكرة مش هيبقى سامع من كلامك حاجة غير كلمتين "نقار ، نكد،نقار ، نكد،نقار ، نكد..."
جوزك الراجل العاقل أبو مخ يوزن بلد بيجي عليه ساعات بيبقى زي عيل عندو 3 سنين، الطفل لو فضلتي تزني عليه بيعند أكثر افتكري ده كويس.
طب إيه الحل لو كان النقار ممنوش فايدة ؟؟ أعمل إيه أنا طيب ؟
إفتكري ديماً القاعدة دي : "الرجالة بتنتبه للأفعال مش الأقوال" يعني لو بدأت موال النقار هيعمل ودن من طين و ودن من عجين بس لو اتبعتي إستراتيجية "الفعل بدل القول" هتقدري تلفتي إنتباهو ... و بطوط هتشرحلك تعملي إييييه ؟؟
تخيلي العيل الصغير اللي مامته بتحسب عليه أنفاسه و متبعاه طول اليوم تلاقيه مبيصدق يختفي شوية عنها عشان يحس باستقلاليته و يختفي فركن و هيشوف إيه اللي هيحصل لو الماما بقى معملتش حاجة بعد شوية تلاقيه جاي يدور عليها و ينده " فينك يا مامي" عشان يتأكد انها لسة هناك مسبتهوش ... الراجل في الحالة دي بيعمل زي الطفل تمام بس بيزيد عليه حاجة وحدة بس : بيشوف لما بيعمل كده مراته بتتصرف ازاي ؟ بتنق عليه ؟ بتجيلها حالة رعب ؟ بتطارده وتجري وراه ؟ أي حاجة من دول لو اتعملت هتخلي الراجل بدل ما يقرب ليها خطوة يبعد عندها خطوة زيادة !
طب نعمل إيه ؟ منعملش حاجة ... أيوة هي كده !
يعني لو هو مش مديكي ريق حلو و مش بيعمل أي مجهود عشان علاقتكو و بيدخل ويسيبك و يروح يمسك الريموت و إنت كل اللي بتعمليه انك تنقي هيعرف إن ده أخرك ... يعني مهما عمل ومهما عملك وحش حتفضلي قايدالو صوابعك العشرة شمع تطبخيلو و تشوفي طلباتو و دلعيه و تدعكيلو رجليه بمية و ملح ههههه لا لا كده مش كويس إنتي لو لاحظتي إن بدء يعاملك بازدراء و مبقاش يبدل مجهود عشانك كل اللي لازم تعميله بدل "النق" هو انك "متديلوش ريق حلو إنتي كمان" وخلي المعاملة في حدود يعني أكلو لبسه و بس كده مفيش "مالك يا حبيبي" "هو أنا غلطت في حاجة يا روحي" ؟ إنتي مغلطيش في حاجة هو اللي عارف إن اللي بيعمله ده غلط في غلط و عايز يشوف إنتي هتعملي إيه ...
الراجل بيحب الست اللي بتوقفه عند حده و مبتسبوش يعمل خدها مداس بس كل ده زي مقلنا بالحنين من غير لا نقار و لا شجار و لا نكد
الحلقة السابعة عشر :-
السلام عليكم يا حبايب قلبي،
إزيكو إزيكو أنا جاية أصيف عندكو
حلقتنا النهاردة هي عبارة عن شهادات للرجالة الكاتبة سألتهم ليه بيفضلو الست القوية اللي مبتسبش حد يدوس على كرامتها و بتوقفه عند حده :
احنا من نعومة أظافرنا و هما بيفهمونا إن البنت حتة شكولاتة و معمولة من سكر و حاجات حلوة، يعني اللطافة و الوداعة هي الحاجة المتوقعة من البنت و أنا متفقة مع البرمجة دي إلى حد ما، بس لازم يكون حد فاصل ما بين اللطافة و الوداعة و الضعف و انها تكون فريسة سهلة لأي واحد عايز يستغلها و يمرمط كرامتها !!!
وزي ما شفنا في الحلقات السابقة الراجل بيقلل من قيمة الست اللي عاملة زي العجين زي ما شكلتها تتشكل و مبتعرفش توقفه عند حده لما يتجاوز حدود الأدب و الاحترام معاها (بس بطريقة المرأة القوية اللي بتعتمد فيها على الدهاء الانثوي )
وأخليكو مع شهادات الرجالة دي :
- لما بحاول استفزها بهزار مثلاً و مبتزعلش و لا تتقمص و بتردهالي بهزار هي كمان ده بيخليها مثيرة في نظري (بس زي ما كلنا الهزار في حدود و ما يمسش الكرامة )
- باحترم الست اللي لو تخطيت معاها الحدود و عملت حاجة تقلل من احترامها بتتكلم معايا بكل هدوء و تقولي يا فلان الحاجة دي مستفزة بالنسبالي و أرجو متكررش.
- أنا بعترف اني ساعات بارجع قرفان من الشغل و بجر شكل مراتي بس عشان ألاقي حد أفرغ عليه الشحنة السلبية اللي جايبها معايا من الشغل، لما مراتي بتوقفني عند حدي و تفهمني إن ده جر شكل و هي معملتلش حاجة سعتها بس بفوق لنفسي و أفهم غلطي.
- لما الست بتكون لطيفة و سكرة طول الوقت ده بيعمل ملل في العلاقة ... و الملل بيطفي شعلة الحب ...
- لما الست بتسكت ديماً و مدفعش عن أرائها و حقها ده بيدي الإنطباع انها "غبية" و "جاهلة" بس لما تكون ست بتعرف تكلم و تقنع في حدود الأدب ده بيخليني فخور إن صاحبة الشخصية الجذابة دي مراتي.
خلاصة القول بيني العين الحمرة من وقت لتاني في حدود و متبقيش زي حتة المارشمالو دي اللي بتختفي أول ما الواحد يحطها في بقه
فاطمة
لا يفوتك أهم المواضيع:
